تطور العقل البشري و صدمات الحياة من وجهة نظري

العقل البشري هو أكبر ظاهرة يجب أن يتم دراستها بشكل مستمر أكثر من أي شئ اخر 

و بالحديث عن العقل و التطور الفكري ، هناك بعض الاشياء التي اريد ان تشاركها في هذا المقال أو النظرية الخاصه بي

يبدء الإنسان في تكوين وعي و فكر تقريبا في سن ست سنوات 

في المرحله دي اللي هي الطفوله و تقريبا بتكون من سن ست سنوات الي 12 سنه 

بيكون الإنسان أو الطفل بيشوف قدامه لونين فقط

الولد بيشوف الابيض لانه لون الخير اللي دايما بينتصر في افلام الابطال الخياليه اللي هو بيتفرج عليها

البنت بتشوف اللون الوردي اللي هو لون الفساتين و الاميرات اللي في افلام الاطفال برضو 

و هنا بتكون حياة الإنسان فعلا ورديه و الطفوله هي المرحله اللي تقريبا بتكون اسعد مرحله في حياتك لانك مش بتتحمل نتيجة اي قرار و مش بتاخد قرارت اصلا 

يعني مثلا الوالد بيدفع مصاريف المدرسه او بيبعتها مع الطفل في ظرف و المدرسه بتطلب من الطفل أو من الوالدين ادوات المدرسه و الوالدين بيشترو لأطفالهم 

يعني انت مش مطلوب منك كشخص حاجة ، لا بالعكس المسؤولية كلها علي الوالدين فقط و انت مجرد بس بتستمتع بكل اللي حواليك 

بعد كده بيدخل في مرحلة المراهقه اللي هي اخطر مرحلة في حياة الإنسان ، و مش غريب أن اسمها بالعربي المراهقه اللي هو بياتي من الفعل يرهق أو مرهق ، لانه فعلا بيراهق حاجات كتير اوي في المرحله دي

و اهم شئ حابب اني اتكلم عنه هو الصدمه

صدمة العقليه 

صدمة الولد لما بيعرف أن مفيش ابطال خارقين و مفيش حد غني زي بروس واين (باتمان) و لا خارق زي كليرك (سوبر مان ) و لو عجبت بنت و صعب أنه يكلمها بسبب مستواه الاجتماعي ف مفيش عنكبوت هيقرصه و حاله يتغير زي بيتر باركر ( سبيدر مان ) 

و البنت برضو بتعرف أن مفيش اميرات خلاص و مفيش امير هيجي علي حصان يخلصها من مشاكلها و أن سندريلا و سنو وايت هما مجرد اساطير و الحياة فيها معاناه اكتر من قصص الاميرات 

صدمة الوقت

أنه لازم يتعامل مع مشاكله ع الحقيقه ، الصدمه كمان بتكون أن مفيش وقت زي ما كان في في المرحله السابقه  

يعني علي سبيل المثال ، الطفوله في الدراسة بتكون تقريبا ٥ أو ٦ سنوات في المدرسه الابتدائيه لكن بعد كده بتكون ٣ سنوات في الاعدادي و ٣ سنوات في الثانوي يعني مفيش مرحله دراسيه طويله و مع العلم أن بعد مرحلة الاعدادي بيبدء ياخد قرارت مصيرية في التعليم يعني هيكمل علمي و لا ادبي هيدرس رياضه و لا تاريخ ، احياء و لا جغرافيا 

صدمة الماديات 

و الصدمه كمان لما بيعرف قيمة الفلوس ، يعني خلاص مش كل اللي بيطلبه هيلاقيه زي زمان ، عايز اقولك أن زمان مكنش بيلحق يطلب اصلا ، يعني الأهل كانو بيشترو الهدوم قبل العيد اصلا و ممكن تكون هدوم اخوه الكبير أو حد اكبر منه في العيله و كمان مواعيد المدرسه و المصاريف و الكتب و مستلزمات المدرسه كانت المعلمه أو المدرسه بتطلب من الوالدين و هما بيحضرو المستلزمات 

لكن دلوقتي انت كبير انت اللي لازم تعرف محتاج ايه و تطلب و كمان طلبك ممكن يترفض 

و ان مش كل اللبس هيكون فساتين أو الوان زاهيه زي زمان لا دلوقتي انتي كبرتي و لازم تخلي بالك من لبسك و نفسك 

صدمة التغير الجسمي 

الي جانب صدمة التغيير ما بين الطفوله و المراهقه ، يعني هيبدء يسأل نفسه امتي شكلي اتغير كده و امتي بقيت طويل و بقا عنده شعر في وجهه و ما الي ذلك ، و أن هو أو أهله أو حتي أقاربه و صحابه هيبدئو يعملون مقارنه بين الطفل و المراهق اللي قدامهم ، كل دي صدمات ليها علاقة بالتغييرات الفسيولوجية اللي حصلت في جسمه 

نفس الكلام بالنسبه للبنت اللي بتحس بالتغييرات دي بشكل اصعب من الولد بكتير من زيادة وزن لازم تتقبلها و الام شهرية لازم تتعامل معاها

صدمة الاهتمام 

لم تعد محور الاهتمام يا صديقي ، لم تعد الطفل المدلل كما كنت في السابق ، هناك طفل آخر في الأسرة أو هناك أشياء أخري تستحق الاهتمام أكثر من اصطدامك بحافة الكرسي في طرقة المنزل ، 

مرحلة الخلاص 

الصدمات دي بتستمر لفترات متفاوتة في منها بيكون كبير جدا و في منها بيكون قصير

و من وجهة نظري أن اسهلهم في التعامل بتكون صدمة التغيرات الجسمانيه ، لان مفيش هروب من شكلك و بالتالي بيبدء المراهق يتقبل شكله الجديد و بالعكس بعد ما بيقبل شكله الجديد ، بينكر شكله القديم و بيكون متضايق من صوره او ذكريات الطفوله 

و لكن الباقيين بيستمرو معاه فترة طويله ممكن تقصر علي باقي حياته ، 

زي ما قلت إن المراهقه بتكون تقريبا ست سنوات 

في اول سنه او اتنين بيتقبل شكله الجديد خلاص 

بعد كده بيبدء يتقبل عامل الوقت و أن مفيش حد أو شئ هيستني أو أن لازم كإنسان بالغ يكون عندك ثقافة الانتظار ، لم تعد كل طلباتك مجابه انت لم تعد طفل مثل السابق . 

و لكن تعد اصعب تحدي هو صدمات الواقع و أن مفيش احلام ورديه و لا عالم كله خير و لونه ابيض و أن الاشرار كتير و مدينة جوثام بها الكثير من الشر و لا يوجد باتمان لمحاربة هذا الشر ، فقط الشرطه ، و انت يا عزيزي لست باتمان و لن تصبح باتمان ، و انتي عليك أن تواجهي مشاكلك مثل سندريلا و لكن لا يوجد جنيات تصنع لك فستان من الخيال أو جزمه علي مقاسك انتي فقط ، و الأمير لن يأتي من القصر حتي يبحث عنك . 

صدمة الواقع هي اللي بتحدد شكل و حياة المراهق في مرحلة الشباب ، هل هتفضل بتعاني في تقبل الواقع و مقارنته باحلامك البريئه و لا هتكون قادر علي تحدي الواقع و خلق بيئه مثاليه ليك و افكار جديده و اسلحتك الخاصه عشان تواجه كل الصعاب دي ، هل انت مستعد عن التخلي عن حلم الطفوله لانه لا يناسب واقع المراهقه ، هل مستعده تتخلي عن حياة الأميرة و تواجهين الشر و تخلصي نفسك الاول . 

و الواقع مرتبط بالامور الماديه ، يعني لازم يتقبل فكرة أن مش كل الطلبات مجابه و أن في مرحلة لازم تكون قادر علي اكتساب أموالك 

و بالنسبه للاهتمام ف بيكون هو جزء كبير جدا من مشاكل المراهقين أنهم بيحتاجو اهتمام عاطفي و آسري اكتر بيكون دائما محتاجين للتشجيع و أن يلاقو دعم عاطفي عشان كده جزء مش قليل منهم حياتهم بتتغير للاسوء عشان مش بيجد هذا الاهتمام في الأسرة 

مرحلة الخلاص ، هي نهاية صدمات المراهقه و بداية تكوين مرحلة الشباب ، لازم تتأكد من وقت التاني أن مبقاش في صدمات تاني في حياتك و انك بدأت تتعامل مع حياتك الجديده بواقعها و حلوها و مرها و أن كل اللي فات اتعلمت منه 

جزء كبير جدا من الشباب بيمر بصعوبات في حياته لانه لم يتخلص من مشاكل المراهقه بشكل كامل و انا لا اريد ان اقول شكل صحي لأنها في الاخر ضغوطات يجب التخلص منها مهما كلف الأمر ، و الاكيد انها هتسيب علامه في حياتك و لكن الأهم هو التخلص منها 

التخلص من قيود الأهل و الاعتماد علي النفس ، التخلص من ضغوط الوقت و الاهتمام و إدراك انك لست محور الكون ، التعامل مع مشاكل الطفوله و مواجهة حقيقه ان طفولتك لم تكن ورديه بالشكل الكامل 

الاشباح

خلي بالك ، الصدمات دي او المشاكل دي اللي بتتعرض ليها أو اتعرضت ليها أو اللي ابنك بيتعرض ليها مش حاجة سهله 

لو لم يتم التعامل معها بشكل صحيح سوف تصبح اشباح تلاحقك طوال عمرك أو على أقل تقدير في فترة شبابك 

سوف تصارع هذا الاشباح في كل علاقة و في كل موقف و لن تنتهي فترة المراهقة من وجهة نظري الا عندما تتخلص من هذا الاشباح 

نقطة سوداء 

و مع الأخذ في الاعتبار أن هناك جيران لك في نفس البلد أو المدينه او في قارة أخري حياتهم عبارة عن اشباح ، 

ف لم يكن لديهم الفرصة المناسبه لطفوله هادئه أو مراهقه صحيه و بالتالي يصبح الشباب في مهب الريح 

عليك أن تعلم أن مرورك بهذا الصدمات هو نعمه و أن الحديد يجب أن يمر في النار حتي يصبح أشد صلابه 

و ان الاهل و الاصدقاء و المجتمع ليس عليهم اي ذنب في هذا المشاكل ، هذة مسؤوليتك انت و عليك وحدك التخلص منها